· Sandra Insua e Sergio Caamaño reuníronse o pasado venres co presidente de Portos de Galicia, José Antonio Álvarez Vidal.
· No encontro tamén lle trasladaron os problemas do marisqueo, a devolución da fianza á comisión de festas de Camelle e presentouse o proxecto da terceira fase do paseo.
A alcaldesa de Camariñas, Sandra Insua, e o primeiro tenente de alcalde, Sergio Caamaño, reuníronse o pasado venres, 27 de outubro, co presidente de Galicia, José Antonio Álvarez Vidal, para solicitar a súa colaboración na reparación da pasarela de madeira do paseo marítimo de Camariñas.
A rexedora amosoulle ao presidente de Portos o mal estado actual no que se atopan as táboas, cos problemas de seguridade para os peóns que isto supón, e salientou que os traballos de reparación que se requiren exceden dun simple mantemento do mesmo.
“Somos conscientes de que o mantemento desa infraestrutura é competencia do Concello, como así o asumimos para solucionar un problema na ponte da dársena, pero o estado no que está pasarela fai que a solución estea máis aló dun simple mantemento”, explica a rexedora. “Ten máis de 16 anos e hai que reformala completamente, cun investimento que o Concello non pode facer xa que Intervención non aprobaría ese gasto, ao ser un investimento”, afirma Sandra Insua.
Ademais, no encontro trasladou outros temas de interese para o Concello como os problemas que afronta a práctica do marisqueo en Camariñas ou a devolución da fianza á Comisión de Festas de Camelle. Tamén se aproveitou para presentar o proxecto da terceira fase do paseo marítimo de Camariñas, desde o Canzorro ata Ramón Noguera.
